රටේ ප්‍රමුඛථතම රාජ්‍ය උසස් අධ්‍යාපන ආයතනය වන කොළඹ විශ්වවිද්‍යාලය මේ වසරේ සිය විද්‍යා හා කලා පීඨ ස්ථාපිත කිරීමේ 100වන සංවත්සරය සමරයි. 1921 දී ලංකා විශ්වවිද්‍යාලය ලෙස ආරම්භ කරන ලද කොළඹ විශ්වවිද්‍යාලය ලෝකප්‍රකට විශ්වවිද්‍යාලයක් සහ ශ්‍රී ලංකාවේ අංක එකේ විශ්වවිද්‍යාලය බවට පත්වෙමින් විශ්වවිද්‍යාල අධ්‍යාපනයට පුරෝගාමී වී තිබේ.
කොළඹ නගර කේන්ද්‍රයේ පිහිටා ඇති කොළඹ විශ්වවිද්‍යාලය සියවසක් පුරාවට කොළඹ නගරයේ වඩාත් කීර්තිමත් ලිපිනය වන රීඩ් මාවතේ (Reid Avenue) සිය ආධිපත්‍ය දරයි. නවීන උපාධි පාඨමාලා ඉදිරිපත් කරමින්, අති නවීන පර්යේෂණ පවත්වමින්, එහි සිසුන්ට සහ ආචාර්ය මණ්ඩලයට වඩාත් නවීන පහසුකම් සපයමින් මෙම කාල පරිච්ඡේදය තුළ විශ්වවිද්‍යාලය අතිශයින් දියුණු වී ඇති අතර එය අඛණ්ඩව වර්ධනය වෙමින් පවතී.
1967 දී පරිගණනය, විද්‍යා විෂය මාලාවේ අනිවාර්ය අංගයක් බවට පත් වූයේ මුල් කාලීනවම එම විෂය පිළිගත් විශ්වවිද්‍යාලයක් සහ අප කලාපයේ එවැනි විෂය මාලාවක් ඉදිරිපත් කළ පළමු ප්‍රධාන විශ්වවිද්‍යාල අතරින් එකක් බවට කොළඹ විශ්වවිද්‍යාලය පත්කරමිනි. අඩ සියවසකට අධික කාලයක් පුරාවට පරිගණන විෂයක්ෂේත්‍රය විශ්වවිද්‍යාලයේ බොහෝ පාඨමාලා හා අධ්‍යයන විෂය ධාරාවන්ට විවිධාංගීකරණය වී ඇති අතර එහි අරමුණු තවදුරටත් වර්ධනය කර ගැනීම සඳහා කැපවූ අධ්‍යයනායතනයක් ලෙස කොළඹ විශ්වවිද්‍යාලයීය පරිගණක අධ්‍යයනායතනය නිර්මාණය කර ඇත.
කොළඹ විශ්වවිද්‍යාලයේ සියවන සංවත්සරය සහ පරිගණක අධ්‍යයනයේ පනස් වසරක සැමරුමේ දී කොළඹ විශ්වවිද්‍යාලයීය පරිගණක අධ්‍යයනායතනය එහි පරිශ්‍රය තුළ ‘කොළඹ විශ්වවිද්‍යාලයීය පරිගණක කෞතුකාගාරය’ විවෘත කිරීම ආඩම්බරයට කරුණකි. එය ශ්‍රී ලංකාවේ මෙවැන්නක් සිදු කළ ප්‍රථම අවස්ථාව ද වෙයි. ඊට සමගාමීව ප්‍රශ්නාවලි සහ ගතික සංදර්ශන සහිතව සිසුන් සහ අමුත්තන් යන දෙපිරිසිටම එක ලෙස අද්විතීය අතථ්‍ය අත්දැකීමක් ලබා දීමට මාර්ගගත ක්‍රමය ඔස්සේ විද්‍යුත් කෞතුකාගාරයක් (eMuseum) emuseum.cmb.ac.lk යන වෙබ් අඩවියෙන් ආරම්භ කෙරෙනු ඇත. පසුගිය වසර 50ක කාලය තුළ භාවිත කර ඇති පරිගණක උපාංග ප්‍රදර්ශනය කිරීම තුළින් විශ්වවිද්‍යාලයේ පරිගණක අධ්‍යාපනයේ ප්‍රගතිය කෞතුකාගාරය හරහා සංක්ෂිප්තව ආවරණය කෙරේ.
අප කෞතුකාගාරය නැරඹීමට සහ වර්තමානය වන විට සෑම පුද්ගලයෙකුගේම සමාජ ජීවිතයේ අනිවාර්ය අංගයක් බවට පත්ව ඇති පරිගණකයේ විකාශනය පිළිබඳ තාක්ෂණික අනාවරණයක් සිදු කිරීම ආරම්භ කිරීමට කොළඹ විශ්වවිද්‍යාලයීය පරිගණක අධ්‍යයනායතනය ලෙස අපි සාඩම්බරයෙන් ඔබට ඇරයුම් කර සිටිමු.
2021 21වන බ්‍රහස්පතින්දා